TTKeyboard ႁဵတ်းဢၢပ်ႉတဵတ်ႉပၼ် တႃႇ လွၵ်းမိုဝ်းတႆး

မိူဝ်ႈဝႃး ဝၼ်းထိ 2025 လိူၼ်မေႇ 19 ၼၼ်ႉ လုၵ်ႉတီႈ ၵေႃၵၢၼ်ဢၢႆႇထီႇတႆးႁဝ်းၶႃႈ လႆႈပိုၼ်ၽၢဝ်ႇ ဢၢပ်ႉတဵတ်ႉ လၵ်းၸဵင်လွၵ်းမိုဝ်းတႆးႁဝ်းသေ မိူဝ်ႈၼႆႉ ႁဝ်းၶႃႈ လႆႈမီးၶၢဝ်ႇလီ တႃႇပိုၼ်ၽႄႈပၼ် ၽူႈသူင်ၸႂ်ႉ လိၵ်ႈတႆးႁဝ်းတင်းသဵင်ႈယူႇ။

မိူဝ်ႈၼႆႉ လုၵ်ႉတီႈ TTKeyboard ဢၼ်ပဵၼ် App Keyboard ၸိုဝ်ႈသဵင်ယႂ်ႇၼႂ်းမိူင်း လႆႈႁဵတ်း ဢၢပ်ႉတဵတ်ႉပၼ်တႃႇ လွၵ်းမိုဝ်းတႆးႁဝ်းၶႃႈ ၸွမ်းၼင်ႇ ၶေႃႈပိုၼ်ၽၢဝ်ႇ မိူဝ်ႈဝႃးၼၼ်ႉသေဢမ်ႇၵႃး တီႈၼႂ်း လွၵ်းမိုဝ်းတႆးၼၼ်ႉ လႆႈသႂ်ႇပၼ်ပႃး ၶေႃႈလၢမ်းၶၢတ်ႈ prediction words ဢၼ်ဢိင်ၼိူဝ် ၶေႃႈၵႂၢမ်းၼႂ်းပပ်ႉသပ်းၸႅင်ႈ လႄႈ လႆႈသႂ်ႇပၼ်ပႃး ႁၢင်ႈ Emoji ၽၢႆႇတႆး ၼၼ်ႉယဝ်ႉ။

ၶေႃႈလၢမ်းၶၢတ်ႈ ဢၼ်ဝႃႈၼၼ်ႉတႄႉ ပေႃးႁဝ်းပေႃႉလိၵ်ႈၼႆ မၼ်းတေမႃးၼႄပၼ်ထႃႈ ဢၼ်တေၸၢင်ႈမႃးလႆႈ မိူၼ်ၼင်ႇ ႁဝ်းပေႃႉ ႁူဝ် ၼႆ မၼ်းတေမႃးၼႄပၼ်ဝႃႈ ႁူဝ် | ႁူဝ်ၸႂ် | ႁူဝ်မႃႇ တႄႇၵႂႃႇ။

မိူၼ်ၼင်ႇ Emoji ဢွၼ်ၵေႃႈ ပေႃးဝႃႈႁဝ်းပေႃႉ ၶေႃႈၵႂၢမ်း ဢၼ်ပႃးႁၵ်ႉ ၼႆၵေႃႈ မၼ်းတေမႃးၼႄပၼ် ႁၢင်ႈမၢၵ်ႇႁူဝ်ၸႂ်ဢွၼ်ႇ၊ ပေႃးပႃးတူၼ်ႈ ၼႆၵေႃႈ တေမႃးၼႄပၼ် ႁၢင်ႈတူၼ်ႈမႆႉ မႆမႆႉ ၸိူဝ်းၼႆႉယဝ်ႉ။

ၸိူဝ်းၼႆႉတႄႉ ပဵၼ် ၽွၼ်းလီ ႁဝ်းၶႃႈ ၸွမ်းလၵ်းၸဵင် Standard သေ ႁဵတ်းသၢင်ႈမႃး လႄႈ လိၵ်ႈတႆးႁဝ်းၶႃႈၵေႃႈ လႆႈၶိုၼ်ႈယႂ်ႇမႃးၼင်ႇၼႆ။ လႆႈယိၼ်းၸူမ်းထိုင် TTKeyboard ယူႇတႄႉတႄႉဝႃႈဝႃႈ တီႈဢၼ်လႆႈ ၵမ်ႉထႅမ် ပၼ် လွၵ်းမိုဝ်းတႆး ႁႂ်ႈၶိုတ်းၵၢပ်ႈမႃးၼင်ႇၼႆ။

သင်ၸိူဝ်ႉဝႃႈ ၶႂ်ႈၸႂ်ႉတူၺ်းၼႆ လူတ်ႇဢဝ် တီႈ လိင်ႉၶ် ၽၢႆႇတႂ်ႈၼႆႉလႆႈယူႇ။ ယၢမ်းလဵဝ်တႄႉ တိုၵ်ႉပဵၼ် ၸၼ်ႉၸၢမ်းတူၺ်း Beta version ၵူၺ်း။ သင်ဝႃႈ ႁၼ် လွင်ႈၽိတ်းပိူင်ၼႆၵေႃႈ ၶႅၼ်းတေႃႈ မွၵ်ႇလၢတ်ႈမႃးလႆႈယူႇၶႃႈ။ ႁဝ်းၶႃႈ တေသိုပ်ႇမူၼ်ႉမႄး ႁႂ်ႈလီသေလီၵႂႃႇၼႃႈ ယူႇဢေႃႈ။

ပေႃးၶႂ်ႈၸၢမ်းၸႂ်ႉတူၺ်း တႃႇ Android ၼႆၸိုင် ဢဝ်လႆႈ တီႈၼႆႈ ယူႇၶႃႈ။ တွၼ်ႈတႃႇ iOS တႄႉ ပေႃးႁဵတ်း ဢၢပ်ႉတဵတ်ႉ ဝၢႆးလင် တေပႃးမႃးယူႇ။