လၢႆးသႂ်ႇ KeyMagic 3

KeyMagic ဢၼ်ဝႃႈၼႆႉ ပဵၼ် ပရူဝ်ႇၵရမ်ႇ လွၵ်းမိုဝ်း ဢၼ်ၸႂ်ႉတိုဝ်း တႃႇပေႃႉလိၵ်ႈ ၵူႈလွင်ႈလွင်ႈ ဢၼ်ၸၢင်ႈသႂ်ႇလႆႈ လွၵ်းမိုဝ်း လၢႆလၢႆမဵဝ်း၊ ဢၼ်ၸၢင်ႈဢဝ်ၸႂ်ႉလႆႈ လွတ်ႈလႅဝ်းထၢင်ႇႁၢင်ႈ ၼၼ်ႉယဝ်ႉ။ တီႈ KeyMagic ၼႆႉ လွၵ်းမိုဝ်းတႆးႁဝ်းၶႃႈၵေႃႈ ၸႂ်ႉမႃးပီယၢဝ်းၶၢဝ်းႁိုင်ယဝ်ႉသေ ယၢမ်းလဵဝ် KeyMagic 3 လႆႈဢွၵ်ႇမႃး မႂ်ႇမႂ်ႇထႅင်ႈယဝ်ႉလႄႈ မိူဝ်ႈၼႆႉ ၸင်ႇလႆႈမႃး တၢင်ႇဝႆႉပၼ် လွၵ်းလၢႆး ဢူၼ်းသႂ်ႇ တီႈၼႂ်းၶွမ်း ဢၼ်ၸႂ်ႉ ပိူင်ၵၢၼ်ၶွမ်း Microsoft Windows ၼႆယဝ်ႉ။ တွၼ်ႈတႃႇ MacOS, Linux ၸိူဝ်းၼႆႉၵေႃႈ ဢဝ်ၸႂ်ႉလႆႈယူႇ။

1. ဢွၼ်တၢင်းသုတ်းတႄႉ တေလႆႈ လူတ်ႇလူင်း ဢဝ် သွပ်ႉ(ၾ်)ဝႄး KeyMagic 3 ၼၼ်ႉယဝ်ႉ။

2. ပေႃးဝႃႈ လူတ်ႉလူင်း Software မၼ်းယဝ်ႉၼႆၸိုင် ပိုတ်ႇပၼ် ၾၢႆႇမၼ်းၼႆၵေႃႈ တေလႆႈႁၼ် ၸွမ်းၼင်ႇ ၽၢႆႇတႂ်ႈၼႆႉယူႇ။

လိူၵ်ႈပၼ် I accept the agreement သေ သိုပ်ႇၼဵၵ်းပၼ် Next လႄႈ။

ၸၼ်ႉၼႆႉတႄႉ ဢမ်ႈတၢပ်ႈလူဝ်ႇ လိူၵ်ႈသင် ၵေႃႈလႆႈယဝ်ႉ။ သိုပ်ႇၼဵၵ်းပၼ် Next သေလႄႈ။

တီႈၸၼ်ႉၼႆႉတႄႉ သင်ဝႃႈ ၸဝ်ႈၵဝ်ႇ ၶႂ်ႈဢဝ် Shortcut မၼ်းဝႆႉတီႈၼိူဝ် ၼႃႈၸေႃးၶွမ်းႁဝ်းၼႆတႄႉ လိူၵ်ႈပၼ်တီႈ Create a desktop shortcut သေၵေႃႈ သိုပ်ႇၼဵၵ်းပၼ် Next လႄႈ။

ပေႃးၼၼ် ၼဵၵ်းပၼ် Install ၼႆသေ ဢူၼ်းသႂ်ႇ KeyMagic 3 လႆႈယဝ်ႉ။

ၼႆႉတႄႉၵေႃႈ ဢူၼ်းသႂ်ႇ KeyMagic ယဝ်ႉတူဝ်လီငၢမ်းယဝ်ႉလႄႈ ၼဵၵ်းပၼ် Finish သေလႄႈ။

ပေႃးၼၼ် မၼ်းတေမႃးၼႄပၼ် လွၵ်းမိုဝ်း ဢၼ်မၼ်းသႂ်ႇဝႆႉပၼ် လူင်ႈၼႃႈၼၼ်ႉသေ သင်ၸိူဝ်ႉဝႃႈ ႁဝ်းၶႃႈ လႆႈၸႂ် တႃႇၸႂ်ႉ လွၵ်းမိုဝ်း ၸိူဝ်းၼၼ်ႉ ၼႆၵေႃႈ ၼဵၵ်းပၼ် Import 4 keyboards ဢၼ်ဝႃႈၼၼ်ႉသေၵေႃႈ မၼ်းတေဢဝ် လွၵ်းမိုဝ်းၸိူဝ်းၼၼ်ႉ သႂ်ႇပၼ်ၵႂႃႇယူႇ။

သင်ၸိူဝ်ႉဝႃႈ ၸဝ်ႈၵဝ်ႇ ဢမ်ႇၸႂ်ႈ လွၵ်းမိုဝ်းၸိူဝ်းၼၼ်ႉသေ ၶႂ်ႈသႂ်ႇ လွၵ်းမိုဝ်းဢၼ်ၸဝ်ႈၵဝ်ႇ ၶႂ်ႈၸႂ်ႉၼၼ်ႉၼႆၸိုင် ၼဵၵ်း Skip သေၵေႃႈ ၶၢမ်ႈပႅတ်ႈ ၵၢၼ်ၸၼ်ႉၼႆႉသေလႄႈ။

ပေႃးၼၼ် ၼဵၵ်းပၼ်တီႈ + Add Keyboard ၼၼ်ႉသေ လိူၵ်ႈပၼ် ၾၢႆႇ Keyboard ဢၼ်ၸဝ်ႈၵဝ်ႇ ၶႂ်ႈသႂ်ႇၼၼ်ႉလႄႈ။ တွၼ်ႈတႃႇ လွၵ်းမိုဝ်းတႆး လူတ်ႇလူင်းဢဝ် တီႈၼႆႈ လႆႈယူႇၶႃႈ။ ပေႃးၼၼ် တေလႆႈႁၼ် ၸွမ်းၼင်ႇ ႁၢင်ႈပႃႈတႂ်ႈၼႆႉယူႇ။

ပေႃးလိူၵ်ႈ လွၵ်းမိုဝ်း ဢၼ်ၸဝ်ႈၵဝ်ႇ ၶႂ်ႈသႂ်ႇယဝ်ႉၼၼ်ႉၼႆ တေလႆႈႁၼ်ၼင်ႇႁၢင်ႈၽၢႆႇတႂ်ႈ ၼႆႉယူႇ။

ပေႃးၼၼ် ႁဝ်းၶႂ်ႈတႄႇၸႂ်ႉ လွၵ်းမိုဝ်းဢၼ်လႂ်ၵေႃႈ ၼဵၵ်းပၼ် တီႈ Activate ဢၼ်ဝႃႈၼၼ်ႉလႄႈ။ သင်ၸိူဝ်ႉဝႃႈ ႁဝ်းၶႂ်ႈ ထွၼ်ပႅတ်ႈၼႆၸိုင် ၼဵၵ်းပၼ်တီႈ Remove ဢၼ်ဝႃႈၼၼ်ႉလႄႈ။ သင်ဝႃႈ ႁဝ်းၶႂ်ႈတွၵ်း ႁၢင်ႈလွၵ်းမိုဝ်းမၼ်းၼႆ ၼဵၵ်းပၼ်တီႈ View Layout ဢၼ်ဝႃႈၼၼ်ႉၼႆ တေလႆႈႁၼ် ၼင်ႇၽၢႆႇတႂ်ႈၼႆႉယူႇ။

ၼႆႉတႄႉပဵၼ် ႁၢင်ႈလွၵ်းမိုဝ်း ဢၼ်ၸဝ်ႈၵဝ်ႇတေၸႂ်ႉၼၼ်ႉယဝ်ႉ။ ပေႃးၶႂ်ႈဢဝ် ၸပ်းဝႆႉတီႈ ၼႃႈၸေႃးၼႆ ၼဵၵ်းပၼ် Pin window to top ဢၼ်ဝႃႈၼၼ်ႉသေ ပေႃးၶႂ်ႈ ၽိမ်းဢွၵ်ႇပဵၼ် ၾၢႆႇ PDF ၼႆ ၼဵၵ်းပၼ်တီႈ Export as PDF ဢၼ်ဝႃႈၼၼ်ႉလႄႈ။

သင်ဝႃႈ ၸဝ်ႈၵဝ်ႇ ၶႂ်ႈလၢႆႈ ၼဵၼ်လတ်း Shortcut မၼ်းၼႆၸိုင် ၼဵၵ်းပၼ်တီႈ တူဝ်လိၵ်ႈ Shortcut ဢၼ်မီး ၽၢႆႇၼိူဝ် Remove ၼၼ်ႉၼႆ မၼ်းတေၼႄ မႃးၼင်ႇ ၽၢႆႇတႂ်ႈၼႆႉယဝ်ႉ။

ပေႃးၼၼ် ၸဝ်ႈၵဝ်ႇ ၶႂ်ႈဝႆႉ ၼဵၼ်လတ်း Shortcut သင်ၵေႃႈ ၼဵၵ်းသႂ်ႇ တီႈၼႂ်း လွၵ်း ဢၼ်ပၼ်ဝႆႉၼၼ်ႉသေ ၼဵၵ်းပၼ် Save ၼႆၵေႃႈ လႆႈယဝ်ႉ။ သင်ဝႃႈ ၶႂ်ႈဝႆႉမိူၼ်ၵဝ်ႇၶိုၼ်းၼႆၸိုင် ၼဵၵ်းပၼ်တီႈ Use Default ဢၼ်ဝႃႈၼၼ်ႉၵေႃႈ လႆႈယူႇ။

ပေႃးၼၼ် တီႈၸဵင်ႇၽၢႆႇတႂ်ႈ ၼႃႈၸေႃးႁဝ်းၼၼ်ႉ တေလႆႈႁၼ် KeyMagic ဢွၵ်ႇမႃး ၸွမ်းၼင်ႇ ၶႅပ်းႁၢင်ႈၽၢႆႇတႂ်ႈၼၼ်ႉယဝ်ႉ။ တီႈဢၼ်ၶႃႈၼႄဝႆႉ တူဝ်ယၢင်ႇမၼ်းၼႆႉတႄႉ ယွၼ်ႉပိူဝ်ႈဝႃႈ ၶႃႈႁဝ်း သႂ်ႇဝႆႉ လွၵ်းမိုဝ်းလၢႆလၢႆမဵဝ်း လႄႈ ဢၼ်တေၼႄမႃးတႄႉ လႅပ်းတေဢမ်ႇမိူၼ်ၵၼ်။

ပေႃးၼၼ်ႉ ၼဵၵ်းပၼ် Windown key + Space bar သေၵေႃႈ ၶၢႆႉလၢႆႈလႆႈ လွၵ်းမိုဝ်းသေ ၸႂ်ႉလႆႈယဝ်ႉ။ ပေႃးႁဝ်းၼဵၵ်း Shortcut မၼ်းၼႆ မၼ်း တေၼႄ မႃးပၼ်ၼင်ႇ ၽၢႆႇတႂ်ႈၼႆႉယူႇ။

ပေႃးၶႂ်ႈၶိုၼ်းၸႂ်ႉ လွၵ်းမိုဝ်းတၢင်ႇဢၼ်ၵေႃႈ ၼဵၵ်းပၼ် Windown key + Space bar သေၵေႃႈ ၶၢႆႉလၢႆႈလႆႈယူႇၶႃႈ။