လၢႆး​ဢူၼ်းသႂ်ႇ လွၵ်းမိုဝ်းတႆး တီႈ Ubuntu

မိူဝ်ႈၵူႈပွၵ်ႈၼႆႉ ပေႃးဝႃႈ တေ​ဢဝ် လွၵ်းမိုဝ်းတႆး ​ဢူၼ်းသႂ်ႇ တီႈၼႂ်း ​ဢူးပုၼ်းတု ၼႆ မၼ်းမီး လွင်ႈယၢပ်ႇယဵၼ်းဝႆႉ။ ယၢမ်းလဵဝ်တႄႉ ပဵၼ်​ဢၼ်ငၢႆႈငႅမ်ႈမႃးယဝ်ႉ။ ပွင်ႈလိၵ်ႈ​ဢၼ်ၼႆႉ ၶႃႈႁဝ်းတေၶႂ်ႈ လၢတ်ႈၼႄ လွၵ်းလၢႆးတႃႇ​ဢဝ် လၵ်းၸဵင်လွၵ်းမိုဝ်းတႆး ​ဢူၼ်းသႂ်ႇ တီႈၼႂ်း Ubuntu ၼၼ်ႉယဝ်ႉ။

ၸၼ်ႉ (1)

ၵႂႃႇတီႈ ႁဵင်းၵွင်ႉ တီႈၼႆႈ လႄႈ။ ပေႃးၼၼ် တေၽႅဝ်ၵႂႃႇတီႈ ၼႃႈလိၵ်ႈ ဝႅပ်ႉသၢႆႉ ​ဢၼ်မီးဝႆႉ လၢႆး​ဢူၼ်းသႂ်ႇ လွၵ်းမိုဝ်းၼၼ်ႉယဝ်ႉ။

ၸၼ်ႉ (2)

ပေႃးၼၼ် ၼဵၵ်းပၼ် Ctrl + Alt + T သေ ပိုတ်ႇ ​terminal ယဝ်ႉ ​ဢဝ် command ၸိူဝ်းႁၼ်ၼင်ႇၽၢႆႇတႂ်ႈၼႆႉ ပေႃႉသႂ်ႇပၼ် ၵမ်းထႅဝ်ထႅဝ်။ ​ဢၼ်လီသေပိူၼ်ႈတႄႉ လိူၵ်ႈပၼ် ၵမ်းထႅဝ်ထႅဝ် တီႈ ၼႃႈလိၵ်ႈဝႅပ်ႉသၢႆႉ ၼၼ်ႉသေ ၼဵၵ်း Ctrl + C သေ ထုတ်ႇ​ဢဝ်ယဝ်ႉ ၵႂႃႇတီႈ Terminal သေ ၶိုၼ်းၼဵၵ်း Ctrl + Shif + V သေ တမ်းသႂ်ႇယဝ်ႉ ၼဵၵ်းပၼ် Enter လႄႈ။

$ mm_kb=https://github.com/naingyeminn/mm-kb/archive/master.zip $ wget $mm_kb 2> /dev/null || curl -OL $mm_kb $ unzip master.zip $ cd mm-kb-master $ sudo apt install make ibus-table -y $ sudo make install $ ibus-daemon -rdx $ im-config -n ibus $ mmfs

ၸၼ်ႉ (3)

ပေႃး​ဢမ်ႇၶႂ်ႈပေႃႉပဵၼ်လၢႆထႅဝ် ၸိူင်ႉၼင်ႇ ၸၼ်ႉ (2) ၼၼ်ႉသေ သင်ၶႂ်ႈ ပေႃႉသႂ်ႇ ထႅဝ်လဵဝ် ၼႆၵေႃႈ လႆႈယူႇ။ တူၺ်း ၼင်ႇ ၽၢႆႇတႂ်ႈၼႆႉၶႃႈလႄႈ။ ၼၼ်ႉပဵၼ် One line installation ယဝ်ႉ။

bash <(wget -qO - http://tiny.cc/mm-kb-install 2> /dev/null || curl -L http://tiny.cc/mm-kb-install)

ၸၼ်ႉ (4)

ပေႃး​ဢူၼ်းသႂ်ႇယဝ်ႉၼႆ တေလႆႈႁၼ် လွၵ်းမိုဝ်းတႆး ​ၶဝ်ႈပႃးဝႆႉယူႇတီႈ သဵၼ်ႈၵၢၼ်လွၵ်းမိုဝ်း ​ဢၼ်မီး တီႈ ၸဵင်ႇၼိူဝ် ၽၢႆႇၶႂႃႇၼႃႈၸေႃးၶွမ်းၼၼ်ႉယဝ်ႉ။ မီးၼင်ႇၼႂ်း ႁၢင်ႈၽၢႆႇတႂ်ႈၼႆႉယဝ်ႉ။

ပေႃးၼၼ် ၸဝ်ႈၵဝ်ႇ တေၸၢင်ႈ ၼဵၵ်း Super Key ႁွင်ႉ Windows Key သေ ၼဵၵ်းပၼ် Space bar ေသၵေႃႈ တေၸၢင်ႈပၼ်ႇသေ လႅၵ်ႈလၢႆႈ လွၵ်းမိုဝ်း ၸိူဝ်းၶဝ်ႈပႃးဝႆႉၼၼ်ႉလႆႈယူႇ။ ပေႃးၼၼ် ၸႂ်ႉလွၵ်းမိုဝ်းတႆး ​ဢၼ်ပဵၼ် လၵ်းၸဵင်လွၵ်းမိုဝ်းတႆး ၼႆႉသေ ၸၢင်ႈပေႃႉလႆႈ လိၵ်ႈတႆး လီလီငၢမ်းငၢမ်းယူႇယဝ်ႉ။ ယွၼ်ႉပိူဝ်ႈ မၼ်းပဵၼ် Smart keyboard လႄႈ ၸိူဝ်းပဵၼ် ( ေ ႄ ​ြ ) ၸိူဝ်းၼႆႉ ​ဢမ်ႇတၢပ်ႈလူဝ်ႇ ပေႃႉၽၢႆႇလင်သေ ပေႃႉၵႂႃႇလႆႈ ၵမ်းသိုဝ်ႈယူႇယဝ်ႉ။ ၵေႃႉၶတ်းၸႂ် တႅမ်ႈပၼ် လွၵ်းမိုဝ်း Smart Keyboard ၼႆႉတႄႉ ပဵၼ် Ko Naing Ye Min ယဝ်ႉ။ သင်ၸိူဝ်ႉ မီးလွင်ႈ ၶႂ်ႈတွင်ႈထၢမ်သင်ၵေႃႈ ပၼ်ၶွၼ်ႇမႅၼ်ႉဝႆႉလႆႈယူႇၶႃႈ။