ဝီႇၶီႇၶၢဝ်ႇ ၽႃႇသႃႇတႆး ပိုၼ်ဢွၵ်ႇပၼ်ယဝ်ႉ

မိူဝ်ႈၼႆႉ ပီ 2024 သႅပ်ႇထႅမ်ႇပႃႇ 24 ဝၼ်း ၼၼ်ႉ လုၵ်ႉတီႈ Wikimedia Foundation သေ လႆႈဢဝ် ဝီႇၶီႇၶၢဝ်ႇတႆး ႁဝ်းၶႃႈ ပိုၼ်ဢွၵ်ႇပၼ် ပဵၼ်တၢင်းၵၢၼ်ယဝ်ႉ။ ဝီႇၶီႇၶၢဝ်ႇတႆး ဢၼ်ဝႃႈၼႆႉ ပဵၼ်ၼႃႈလိၵ်ႈၶၢဝ်ႇ ဢၼ်လွတ်ႈလႅဝ်းထၢင်ႇႁၢင်ႈ ဢၼ်တႅမ်ႈတၢင်ႇပၼ်ဝႆႉ ၶၢဝ်ႇႁူဝ်ႁုပ်ႈ၊ ၶၢဝ်ႇၶိုတ်းတၼ်း ၸိူဝ်းပဵၼ် ၶၢဝ်ႇၼႂ်းမိူင်း၊ ၼွၵ်ႈမိူင်း ၶၢဝ်ႇတၢင်းလူၵ်ႈၼၼ်ႉယဝ်ႉ။

ဝီႇၶီႇၶၢဝ်ႇၼႆႉ မၼ်းပဵၼ် ဝီႇၶီႇ ငိူၼ်ႈငဝ်ႈၶၢဝ်ႇ ဢၼ်လွတ်ႈလႅဝ်းထၢင်ႇႁၢင်ႈ လႄႈ ပဵၼ် ၶူင်းၵၢၼ် ၶွင် ၾွင်ႇတေးသျိၼ်း ဝီႇၶီႇမီႇတီႇယႃႇ ဢၼ်ၼိုင်ႈယဝ်ႉ။ ၶူင်းၵၢၼ်ဝီႇၶီႇၶၢဝ်ႇၼႆႉ မၼ်းပဵၼ် လွင်ႈတႅမ်ႈၵၢၼ်ၶၢဝ်ႇ ၽိုၼ်တၢင်ႇလၢတ်ႈ၊ ႁူဝ်ႁုပ်ႈၶၢဝ်ႇ ဢၼ်ဢမ်ႇပႄႉပႃႉၽၢႆႇလႂ်သေ တႅမ်ႈတၢင်ႇၼႄ ၶၢဝ်ႇ ၼၼ်ႉယဝ်ႉ။

ဝီႇၶီႇၶၢဝ်ႇတႆးၼႆႉ လႆႈတႄႇ သၢင်ႈပဵၼ် ၶူင်းၵၢၼ်ၸၢမ်း မိူဝ်ႈပီ 2022 လိူၼ်ၸုၼ်ႇၼၼ်ႉသေ ထိုင်မႃး ပီ 2024 လိူၼ်သႅပ်ႇထႅမ်ႇပႃႇ 24 ၼၼ်ႉ လုၵ်ႉတီႈ ၾွင်ႇတေးသျိၼ်း ဝီႇၶီႇမီႇတီႇယႃႇ လႆႈမၵ်းမၼ်ႈယိုၼ်ယၼ်ပၼ် ပဵၼ်တၢင်းၵၢၼ်သေ ၸင်ႇလႆႈ ပိုတ်ႇပၼ် ၼႃႈလိၵ်ႈ ဝီႇၶီႇၶၢဝ်ႇ တွၼ်ႈတႃႇ ၽႃႇသႃႇတႆးၼၼ်ႉယဝ်ႉ။

ၼႂ်းၵႃႈ ၶူင်းၵၢၼ် ဝီႇၶီႇမီႇတီႇယႃႇ ၼၼ်ႉ ပေႃးပႃး ၶူင်းၵၢၼ် ဝီႇၶီႇၶၢဝ်ႇတႆးၼႆၸိုင် ဢၼ်ပဵၼ် ၶူင်းၵၢၼ် ၽႃႇသႃႇတႆးၼႆႉ တင်းမူတ်း မီးမႃး ႁႃႈဢၼ်ယဝ်ႉ။ ၸိူဝ်းၼၼ်ႉတႄႉ -

1. ဝီႇၶီႇၽီးတီးယႃး
2. ဝိၵ်ႇသျိၼ်ႇၼရီႇ
3. ဝီႇၶီႇဝွႆးဢဵတ်ႇꩡ်
4. ဝီႇၶီႇပပ်ႉ
5. ဝီႇၶီႇၶၢဝ်ႇ

ၼႆယဝ်ႉ။ ၶူင်းၵၢၼ် ဝီႇၶီႇ ၸိူဝ်းၼႆႉ လုၵ်ႉတီႈ ၸုမ်း SIIT ႁဝ်းၶႃႈ လႆႈ ဢွၼ်ႁူဝ်ၼမ်းၼႃႈသေ ၵူၼ်းသူင်ၸႂ် ၵူႈတီႈၵူႈလႅၼ် ၼႂ်းပတ်ႉပိုၼ်ႉလုမ်ႈၾႃႉ ဢွၼ်ၵၼ် ၶဝ်ႈပႃး ႁူမ်ႈသၢင်ႈၸွမ်းၵၼ်မႃးလႄႈ ၸင်ႇလႆႈမီး လွင်ႈဢွင်ႇမၢၼ် မႃး ၼင်ႇၼႆယဝ်ႉ။

ၼင်ႇႁိုဝ် ၶူင်းၵၢၼ် ဝီႇၶီႇတႆးႁဝ်းၶႃႈ ပေႃးတေၶိုၼ်ႈယႂ်ႇမႂ်ႇသုင်ၵႂႃႇ ဝၼ်းတႃမိူဝ်းၼႃႈၼၼ်ႉ ႁဝ်းၶႃႈ တိုၵ်းသူၼ်း ၽူႈသူင်တႅမ်ႈလိၵ်ႈ ၽူႈသူင် ပိုၼ်ၽႄႈ လွင်ႈႁူႉတၢင်းႁၼ်ၶဝ် တင်းလၢႆ ႁႂ်ႈဢွၼ်ၵၼ် ႁူမ်ႈသၢင်ႈၵႂႃႇသေၵမ်း ၼႆဢေႃႈ။